Francisco Forgiamonte scribe in Interlingua

Interlingua es un lingua planificate natural, un lingua soror del familia del linguas romance. | Interlingua ist eine natürliche Plansprache, eine Schwestersprache der romanischen Sprachfamilie. | Interlingua is a natural planned language, a sister language of the Romance languages.

Friday, December 09, 2005

Laco de Constantia - basse nivello del aqua


Nostre jornal quotidian ha reportate hodie que le nivello del aqua del Laco de Constantia es assi basse a un 8 decembre como nunquam desde le prime notation de nivellos ante 140 annos. Nos ha aspectos inaccostumate: Le stratas de ripa es ample e il ha nascite bancos de sablo e le insula Mainau es attingibile a pede super le fundo aride inter le terra firme e le insula. Le nivello es 70 centimetros sub le nivello medie pro un decembre usual, un nove record. Le causa es le mancantia de pluvia in le menses passate. Per conditiones natural in le curso de un anno, le nivello del aqua es le plus basse durante le menses decembre fin a martio. Le minimo esseva mensurate in le februario e martio de 1958.
Anque in le estate passate le nivello esseva un metro plus basse que saisonal usual. On habeva expectate un normalisation post le crescita del aqua in augusto, que esseva causate del precipitationes immense in le Alpes, ubi il habeva inundationes periculose. Ma depost le aqua se abassava rapidemente, nam il habeva pluvite assi pauco in iste autumno, como illo non es normal al laco. Usque nunc le nivello basse non ha provocate preoccupation. "Pro le natura le situation non es dramatic e le approvisionamento de aqua potabile es assecurate", diceva le experto responsabile, "pro alicun zonas al laco le aqua basse es mesmo de avantage". Assi, inter alteres, le reparation del postes del constructiones lacustre al area del village ex le etate del petra e bronzo (ante 5000 e 3000 annos) a Überlingen pote facite al sic, nam le major parte del postes nunc es libere de aqua.

2 Comments:

  • At 9:13 AM, Blogger N said…

    Io me demanda si le nivello del aqua ora se ha normalisate un poco, o si illo ancora es multo plus basse que normal? In 2003, post un estate sin multe pluvia, in Norvegia nos habeva un periodo con nivello multo basse in le magasines del aqua, que es le base pro le production de electriciate. Le precio de electriciate naturalmente cresceva a nove records. Ora le nivello del aqua es normal (ma le precio del electricitate ancora non se ha bassate al nivello ante le crise ...)

     
  • At 10:36 AM, Blogger FSchmiedeberg said…

    Car Morten,
    si, si, le comportamento es sempre le mesme, in toto le mundo: Si un interprisa ha augmentate le precios de un producto a causa de un mancantia de materia prime a un certe tempore, le precios non es diminuite post que le mancantia non plus existe. Le mesmo face le stato concernente impostos: impostos unquam augmentate o introducite, pro un tempore limitate, nunquam es diminuite; il es un strata de senso/direction unic...

    Ma nostre Laco de Constantia (o un altere laco) normalmente non es como un interprisa o le stato, nostre laco jam hodie ha un poco plus de aqua, ma non troppo plus. Illo se reimplera, quando le pluvia, que ora es ligate como nive al montes del Alpes, se va liquefacer per le sol primaveral.

     

Post a Comment

<< Home